Governu Diskute Atu Rezolve Problema Timoroan Iha Rai-Li’ur Sira-Nia Pasaporte Mate

Dili, 05 Marsu 2021 – Vise Ministru Interiór (MI) Antonio Armindo simu vizita hosi Vise Ministru Negósiu Estranjeiru no Kooperasaun (MNEK) Julião da Silva, hodi ko’alia kona-ba prosedimentu sira ne’ebé sai nu’udar Governu nia responsabilidade hodi rezolve problema ne’ebé timoroan sira iha rai-li’ur hasoru hela oras ne’e kona-ba pasaporte mate no seidauk renova tanba pandemia globál Covid-19 impede.

Hafoin enkontru ho Vise MI ne’ebé realiza ohin (05/3) iha Vila-Verde, Dili, ne’e remata, Vise MNEK dehan katak nia sei halo mós enkontru ho Ministru Justisa hodi ko’alia kona-ba oinsá mak kria mekanizmu ida atu rezolve ho lalais sidadaun timoroan iha rai-li’ur sira-nia pasaporte ne’ebé mate.

Vise MNEK mós hato’o nia apelu ba timoroan sira iha rai-li’ur ne’ebé pasaporte mate atu la persiza tama ilegál mai Timor-Leste. 

“La presiza tama ilegál tanba nasaun sira ne’ebé ita-nia ema iha ba fó ona fleksibilidade atu prolonga,” Nia akresenta.

Fonte: Mídia Serviço Relações Públicas de Ministério do Interior

Notísia Hotu-Hotu >