Intituisaun PNTL Husu Deskulpa Ba Organizasaun Mundiál Ba Saúde

Dili, 26 Marsu 2020 - Komandu Polísia Nasional Timor-Leste (PNTL) liuhosi Komandante Jerál Komisáriu Polísia Faustino da Costa lori Instituisaun nian naran hato’o deskulpa ba Organizasaun Mundial ba Saúde (OMS) relasiona ho deklarasaun falta kuidadu husi ofisias PNTL nian iha (23/03).

Liuhosi konferénsia imprensa Komisáriu Polísia Faustino hato’o ba públiku liga ba atividade balun ne’ebé hala’o iha (23/03), PNTL servisu hamutuk ho Ministériu Saúde (MS) no OMS halo Sensibilizasaun kona-ba COVID-19 iha Kuartél Komandu Jerál PNTL nian. Durante atividade sensibilizasaun no aprezentasaun ida ne’e, iha mós faze ida kona-ba husu perguntas no pedidu esklaresimentu balun.

“Loos duni iha ami nia ofisiál superiór ida hosi Komandu PNTL hato’o perguntas, sugestaun ne’ebé ikus mai mós hafoin enkontru ne’e remata, ami nia ofisiál ne’e halo konferénsia ida ba mídia hodi repete pedidu ne’ebé hato’o durante enkontru, haree ba situasaun sira ohin loron hanesan mós prezensa ONU nian iha Timor-Leste [..] Komandu mós nota no hatene katak husi publikasaun ne’ebé iha bele hamosu mós efeitu seluk, tanba ne’e Komandu PNTL husu ba membru tomak atu garante paz no estabilidade ba ema hotu-hotu iha Timor, la’ós ba timoroan sira deit maibé ba ema hotu hanesan [...]”, apela Komisáriu Polísia.

Iha oportunidade ne’e, Komandante Jerál lori Instituisaun PNTL nia naran hato’o deskulpa ba OMS no fiar katak ita sei servisu hamutuk nafatin, iha koordenasaun ne’ebé di’ak ba oin oinsá ita hamutuk ba interese povu no nasaun.

Fonte: Mídia Polícia Nacional de Timor-Leste (PNTL)

Notísia Hotu-Hotu >