Dili, 13 Janeiru 2021 - Xefe Estadu Maiór Jenerál Lere Anan Timur, husu atu halo investigasaun ba aviaun ho númeru VH-IJL ne’ebé transporta ofisiál World Food Programa (WFP) ho moras Covid-19 hosi Indonézia atu ba Austrália, ne’ebé atera ka tún iha Aeroportu Prezidente Nicolau Lobato Komoro, Dili, iha tersa (12/01) iha oras 16:30 HTL hodi ense avtur/mina. Hafoin ense mina, lakonsege semo tanba roda kuak hodi para tán iha ne'ebá.

Lere haktuir, aviaun ne’e tún iha Aeroportu Komoro tanba hetan autorizasaun hosi Ajénsia Nasionál Aviasaun Timor-Leste, maibé presiza atu halo investigasaun hodi bele identifika loloos nia razaun ka objetivu ruma.

Lere hato’o nia preokupasaun kona-ba aviaun ne’e ba Prezidente Repúblika Francisco Guterres Lú Olo, wainhira sira hasoru malu ohin (13/01) iha Palásiu Prezidensiál Ai-tarak Laran, Dili.