Dili, 18 Fevereiru 2021 – Ministériu Saúde relata katak pasiente Covid-19 hamutuk na’in-18 iha Timor-Leste mak rekuperadu ona, maibé mós rejista fali kazu foun pozitivu Covid-19 ida (1), nia ho sexu mane no idade 28.

“Pasiente ne’e asintomátiku no dadauk ne’e iha ona izolamentu Vera-kruz, Dili. […] Swab teste foti iha 16 Fevereiru no rezultadu pozitivu relata iha dia 18 Fevereiru,” Koordenadór Pilár VII Covid-19 Nilton do Carmo da Silva informa ohin (18/2) iha Palácio das Cinzas, Dili.

Enkuantu kona-ba númeru rekuperadu foun na’in-18 hosi izolamentu Vera-krúz Dili ne’e, Nilton esplika katak na’in tolu (3) hosi nasaun Tanzánia, na’in rua (2) nu’udar sidadaun ne’ebé tama ilegál, no na’in-13 mai hosi Indonézia liuhosi pontu entraga Batugadé iha 20 Janeiru 2021.

Nune’e, pasiente pozitivu Covid-19 ne’ebé oras ne’e baixa hela iha Timor-Leste tún ba na’in-22.