Fahi Hamutuk 2.145 Mak Mate Ona Tanba Kauza Husi Peste Suína Afrikana

Díli, 4 Outubru 2019 - Ministru Agrikultura no Peskas (MAP), Joaquim dos Reis Martins, halo abertura Enkontru Ekstraordináriu preparasaun ba medidas Konkretas hodi Kontrola Moras ASF (Africa Swine Fever) ka Peste Suína Afrikana (PSA), iha Salaun MAP Comoro.

Tuir dadus husi MAP hatudu katak fahi hamutuk 2.145 mak mate ona tanba kauza husi moras Peste Suína Afrikana (PSA). Dadus hirak ne’e hatudu Munisípiu Dili, fahi hamutuk 627, Ermera 860, Lautem 439 no Manatutu 219 mak mate ona.

Tamba ne’e, Ministru Joaquim Martins halo enkontru estraordináriu ho ekipa tékniku MAP hamutuk ho liña ministeriál sira hodi husu atu forma ekipa taskforce hodi halo kontrolu másimu ba parte hotu atu bele prevene no minimiza moras fahi.

Nune’e mos presiza halo identifikasaun fatin hodi halo kontrolu, hanesan Aeroportu, portu no supermerkadu hodi kontrola hahán sira liu-liu hahán lata ne’ebé fa’an iha loja.

Fonte: Mídia Ministério da Agricultura e Pescas (MAP)

Notísia Hotu-Hotu >