KM Deside Estende Serka Sanitária Iha Baukau No Vikeke To’o 10 Abril

Dili, 01 Abril 2021 – Konsellu Minsitru (KM) realiza reuniaun ohin (01/4) liuhosi vídiu-konferénsia no aprova projetu rezolusaun kona-ba nafatin estende ka mantéin serka sanitária no konfinamentu domisiliáriu jerál populasaun nian iha munisípiu Baukau no Vikeke to’o 10 Abril 2021 ho oras 23:59.

Ba estensaun refere, Governu mós mantéin regra hotu-hotu ne’ebé define ona iha rezolusaun anteriór kona-ba serka sanitária no konfinamentu antes ne’e, nune’e sidadaun hotu-hotu ne’ebé hela iha munisípiu rua ne’e sei kumpri nafatin konfinamentu domisiliáriu jerál ka hela de’it iha uma.

Governu mós kontinua bandu sidadaun sira atu halo sirkulasaun hosi munisípiu Baukau no Vikeke ba munisípiu seluk no hosi munisípiu seluk ba fali munisípiu rua ne’e, exetu iha kazu sira ne’ebé ho fundamentu no razaun forte relasiona ho seguransa públika, saúde públika, asisténsia umanitária no importánsia ba interese públiku nian.

Fonte: Mídia Gabinete do Primeiro Ministro (GPM)

Notísia Hotu-Hotu >